Махгіліс (Макс) Эйвэ (Machgielis «Max» Euwe; 20.5.1901, Ватэрграфсмер, каля г. Амстэрдам, Нідэрланды — 26.11.1981) — галандскі шахматыст, шахматны літаратар. Міжнародны гросмайстар (1950), міжнародны арбітр (1951).
Скончыў Амстэрдамскі ўніверсітэт (1926). Доктар матэматыкі. Выкладчык ліцэя (Амстэрдам), дырэктар Нідэрландскага даследчага цэнтра апрацоўкі інфармацыі з дапамогай ЭВМ (1958-64), прафесар Тылбургскага і Ратэрдамскага ўніверсітэтаў (1964-71). Прэзідэнт Міжнароднай шахматнай федэрацыі (ФІДЕ) у 1970-78. 5-ы ў гісторыі шахмат чэмпіён свету (1935-37). Шматразовы пераможца і прызёр буйных міжнародных турніраў (1921-55), удзельнік больш як 30 матчаў (1921-40). 13-разовы чэмпіён Нідэрландаў. Узначальваў каманду Нідэрландаў на IX, XI, XIII, XIV, XV і XVI Сусветных шахматных алімпіядах (1927-62).