Лінаўскі сельсавет — адміністрацыйна-тэрытарыяльная адзінка ў складзе Пружанскага раёна Брэсцкай вобласці. Цэнтр — аграгарадок (да 2008 г. вёска) Лінава.
Утвораны 12 кастрычніка 1940 года як Лінёўскі сельсавет у складзе Пружанскага раёна Брэсцкай вобласці БССР. Цэнтр — вёска Лінёва (Лінова), пазней Лінава-1. 9 сакавіка 1959 года ў склад сельсавета з Ткачоўскага сельсавета перададзена вёска Млынок[1], 11 чэрвеня 1962 года — вёска Варотнае[2]. 16 сакавіка 1987 года скасаваны вёскі Ліновачка (злілася з вёскай Аранчыцы) і Лінава 2 (злілася з вёскай Лінава 1)[3]. 26 лютага 2002 года да сельсавета далучана тэрыторыя скасаванага Смалянскага сельсавета, 18 лістапада 2005 года — тэрыторыя скасаванага Бакунскага сельсавета (вёскі Араб’і, Бакуны, Вінец, Занявічы, Концыкі, Кутнявічы, Мікалаевічы, Обеч, Рапяхі, Ткачы)[4]. 29 снежня 2005 года цэнтр сельсавета перайменаваны ў Лінава.
Насельніцтва сельсавета паводле перапісу 2009 года — 3814 чалавек[5], з іх 89,2 % — беларусы, 4,8 % — рускія, 4,7 % — украінцы[6].