Лысьва (руск.: Лысьва) — горад (з 1926 года) у Расіі, адміністрацыйны цэнтр Лысьвенскага раёна Пермскага края. Насельніцтва 26,4 тыс. чалавек (2008). Заснаваны ў 1785 годзе. Размешчаны на ўсходзе краю, за 206 км на ўсход ад Пермі. Станцыя на чыгунцы Чусаўская — Кузіна.
Вядучымі галінамі ў структуры народнай гаспадаркі горада з’яўляюцца машынабудаванне і металаапрацоўка, лёгкая прамысловасць, прадстаўленыя таксама прамысловасць па вытворчасці будматэрыялаў, прадпрыемствы, якія перапрацоўваюць сельскагаспадарчую прадукцыю. Лысьвенскі металургічны завод вырабляе ліставы пракат, электралітычна ацынкаваную сталь з палімернымі пакрыццямі, эмаляваны і ацынкаваны посуд, малочныя пляшкі. ТАА “Лысьвенскі завод цяжкага электрычнага машынабудавання «Прывад» («Электрацяжмаш-Прывад») — вядучае прадпрыемства Расіі па вытворчасці турбагенератараў магутнасцю 2,5 — 32 тыс. кВт і сінхронных электрарухавікоў, выпускаюцца таксама электрарухавікі для выпампоўвання з свідравін пітнай вады. Лёгкая прамысловасць прадстаўленая панчошна-пальчаточнай фабрыкай (вытворчасць дзіцячых рукавіц, шкарпэтак, пальчатак, жаночых калготкаў). У горадзе працуюць таксама завод жалезабетонных вырабаў, мясакамбінат. Асноўнае будаўнічае прадпрыемства горада — МУУП «Лысьвабудзаказчык».