Лапа́ціцкі сельсавет — адміністрацыйна-тэрытарыяльная адзінка ў складзе Слаўгарадскага раёна Магілёўскай вобласці Беларусі. Цэнтр — аграгарадок (да 2009 года вёска) Лапацічы.
Утвораны 20 жніўня 1924 года ў складзе Прапойскага раёна Магілёўскай акругі БССР. Пасля скасавання акруговай сістэмы 26 ліпеня 1930 года ў Прапойскім раёне БССР, з 20 лютага 1938 года — Магілёўскай вобласці. 23 мая 1945 года Прапойскі раён быў перайменаваны ў Слаўгарадскі. 16 ліпеня 1954 года да сельсавета далучана тэрыторыя скасаваных Іванішчавіцкага і Рабаўскага сельсаветаў[1]. З 25 снежня 1962 года ў складзе Чавускага раёна, з 6 студзеня 1965 года ў складзе адноўленага Слаўгарадскага раёна. На 1 студзеня 1974 года ў складзе Лапаціцкага сельсавета было 16 населеных пунктаў[2].
Насельніцтва сельсавета паводле перапісу 2009 года — 1328 чалавек[3], з іх 95,9 % — беларусы, 3,1 % — рускія, 0,4 % — украінцы[4]. Станам на 2011 год у сельсавеце налічвалася 672 двары, 1489 жыхароў.