Спіс пінскіх князёў — спіс князёў, якія кіравалі Пінскім княствам. У артыкуле прыведзены спіс князёў з падзелам паводле дынастыі і перыяду кіравання.
Першы незалежны князь Тураўскага княства Юрый Яраславіч памёр паміж 1167—1170 гг., напэўна ён падзяліў Тураўскае княства паміж сваімі сынамі. Іван стаў тураўскім князем, Святаполк — пінскім, Яраслаў — клецкім, Глеб — дубровіцкім, Яраполк — гарадзецкім, з гэтага часу ў Тураўскім княстве пачынаецца феадальная раздробленасць.
Другі сын Юрыя Яраславіча — Святаполк Юр’евіч, які атрымаў ва ўдзел Пінскае княства, стаўшы родапачынальнікам пінскай галіны Ізяславічаў. Пазней Пінск, як другі горад Тураўскай зямлі, пераходзіў да другога па старшынстве Юр’евіча. Пачынаючы з Уладзіміра Святаполкавіча, сына Святаполка Юр’евіча, у Пінску ўсталяецца свая галіна дынастыі Ізяславічаў, а Пінск па важнасці і сіле выходзіць на першае месца ў Тураўскай зямлі.