Забрэ́зскі валун — геалагічны помнік прыроды ў Беларусі, каля аўтадарогі Мінск—Ашмяны. Размешчаны за 2 км на поўдзень ад в. Забрэззе Валожынскага раёна Мінскай вобласці. Вялікі ледавіковы валун ружавата-шэрага сярэднезярністага мігматыту. Даўжыня валуна складае 4,6 м, шырыня 3,6 м, вышыня 1,7 м, у абводзе 12,8 м, аб’ём 15 м³, маса каля 40 т. Прынесены ледавіком каля 200—120 тысяч гадоў назад з паўднёвай Карэліі. На паверхні Забрэзскага валуна захавалася вялікае паглыбленне глыбінёй да 10 см і 50—70 см у папярочніку.