Джордж Морленд (англ.: George Morland; 26 чэрвеня 1763, Лондан — 29 кастрычніка 1804, там жа) — англійскі жывапісец, прадстаўнік рамантызму.
Джордж Морленд нарадзіўся ў сям’і мастака, гравёра і рэстаўратара Генры Роберта Морленда; ён быў трэцім з 6 дзяцей. Маляваць пачаў яшчэ ў дзяцінстве, некаторыя з яго работ таго часу выстаўляліся ў Каралеўскай акадэміі мастацтваў (КАМ) у 1773 годзе, а затым у Таварыстве свабодных мастакоў у 1775 і 1776 гадах. Паўторная экспазіцыя прац Джорджа Морленда ў КАМ адбылася ў 1778, 1779 і 1780 гадах. Некаторы час Морленд вучыўся ў школе пры КАМ, аднак галоўным яго выкладчыкам быў бацька, у якога «ў чалядніках» Джордж працаваў 7 гадоў, пачынаючы з 14-гадовага ўзросту. Ён вывучаў таксама творы старых майстроў, наведваючы мастацкія галерэі.
У 1785 годзе мастак здзейсніў паездку ў Францыю, а на наступны год ажаніўся. Шлюб гэты, які адбыўся па вялікім узаемным каханні, прынёс у жыццё Морленда значныя змены, у тым ліку негатыўныя. Фінансавыя яго справы неўзабаве прыйшлі ў поўны заняпад, і ў 1789 годзе яму прыйшлося ўцякаць ад крэдытораў з Лондана ў Лестэршыр. У 1799 годзе ён зноў схаваўся ад крэдытораў, на гэты раз на востраў Уайт, некаторы час жыў у Ярмуце, але ў канцы года вярнуўся ў Лондан. Тут Морленд быў арыштаваны за даўгі і зняволены ў Каралеўскую турму Бенч. У 1802 годзе мастак быў вызвалены, але 19 кастрычніка 1804 года зноў арыштаваны.