Грудзі́наўскі сельсавет — былая адміністрацыйна-тэрытарыяльная адзінка ў складзе Быхаўскага раёна Магілёўскай вобласці. Цэнтр — аграгарадок Грудзінаўка.
Утвораны 20 жніўня 1924 года як Грудзінаўскі 1-шы сельсавет у складзе Быхаўскага раёна Магілёўскай акругі БССР. Цэнтр — вёска Грудзінаўка 1-я. 21 жніўня 1925 года да сельсавета далучана частка скасаванага Сідаравіцкага сельсавета Лупалаўскага раёна. Пасля скасавання акруговай сістэмы 26 ліпеня 1930 года ў Быхаўскім раёне БССР, з 20 лютага 1938 года — Магілёўскай вобласці. 24 верасня 1939 года разбуйнены на Грудзінаўскі і Красніцкі сельсаветы. 16 ліпеня 1954 года да сельсавета далучана тэрыторыя скасаваных Красніцкага і Чырвонаасавецкага сельсаветаў[1]. 20 лістапада 2013 года скасаваны, тэрыторыя далучана да Следзюкоўскага сельсавета[2].
Насельніцтва сельсавета паводле перапісу 2009 года складала 1179 чалавек[3], з іх 95,8 % — беларусы, 3,3 % — рускія, 0,8 % — украінцы[4].
На момант скасавання ў склад сельсавета ўваходзілі 9 населеных пунктаў: аграгарадок Грудзінаўка, вёскі Бутрамееўка, Бынава, Давыдавічы, Красны Асавец, Лісічнік, Перакладавічы, Прыберажжа і Рыжкаўка.