Георг Тракль (ням.: Georg Trakl; 3 лютага 1887, Зальцбург — 3 лістапада 1914, Кракаў) — выбітны аўстрыйскі паэт.
Вершаваная спадчына Тракля невялікая па аб’ёме, але аказала значны ўплыў на развіццё нямецкамоўнай паэзіі. Трагічнае светаадчуванне, пранізлівыя вершы паэта, сімвалічная ўскладненасць вобразаў, эмацыйная насычанасць і сугестыўная сіла верша, зварот да тэм смерці, распаду і дэградацыі дазваляюць прылічыць Тракля да экспрэсіяністаў, хоць сам ён фармальна не належаў ні да адной паэтычнай групоўкі.