Ганс (Ханс) Макарт (ням.: Hans Makart; 28 мая 1840, Зальцбург — 3 кастрычніка 1884, Вена) — аўстрыйскі мастак, дэкаратар, дызайнер мэблі і інтэр’ераў, мастак па касцюмах, прадстаўнік акадэмізму.
Макарт навучаўся жывапісу ў Мюнхене ў Карла Тэадора фон Пілоці. У 1861—1865 гадах Ганс Макарт выпрацаваў уласны стыль. Першая яго карціна — «Лавуазье ў турме» — была прысвечана апошнім дням вялікага французскага фізіка, ахвяры якабінскага тэрору.
Ганс Макарт — аўтар вялікіх гістарычных і алегарычных кампазіцый, мноства партрэтаў. Пры жыцці атрымаў шырокае прызнанне і меў шмат прыхільнікаў. Яго студыя ў 1870-1880 гадах была цэнтрам культурнага жыцця венскага грамадства.
Макарт аказаў уплыў на еўрапейскіх мастакоў-мадэрністаў, такіх як Густаў Клімт і Альфонс Муха.
У 1882 годзе імператар Франц Іосіф даручыў Макарту роспіс спальні імператрыцы Лізаветы на віле Гермес у венскім прадмесці Лайнцэр Ціргартэн. Жывапіс павінен быў ілюстраваць «Сон у летнюю ноч» Шэкспіра. Макарт выканаў мноства эцюдаў, але распісаць сцены яму перашкодзіла смерць. Ён памёр ва ўзросце 44 гадоў ад выкліканага сіфілісам прагрэсіўнага паралічу. Заказ на віле Гермес быў выкананы мастакамі Густавам і Эрнстам Клімтамі і Францам Мачам.
Большасць прац Макарта знаходзяцца ў музеях Вены. Макарт намаляваны на аўстрыйскіх паштовых марках 1932, 1948 і 1990 гадоў.