Ганна Алаіза Хадкевіч (у дзявоцтве Астрожская; 25 сакавіка 1600 — 27 студзеня 1654[1]) — грамадска-рэлігійны дзеяч Рэчы Паспалітай.
Ганна Алаіза — апошняя прадстаўніца роду Астрожскіх.
З княжацкага роду Астрожскіх гербу ўласнага, дачка Аляксандра і Ганны з Косткаў.
28 лістапада 1620 выйшла замуж за гетмана вялікага літоўскага Яна Караля Хадкевіча. Аднак неўзабаве гетман накіраваўся на сойм у Варшаву, а потым у сваю апошнюю выправу, не ўступіўшы ў правы мужа.
Па смерці Я. К. Хадкевіча (1621) узяла абяцанне бязшлюбнасці, вяла аскетычны лад жыцця. Ахвяравала сродкі на карысць каталіцкіх святыняў. Па яе фундацыі ў 1624 у Астрозе адкрыўся езуіцкі кляштар з калегіумам. Таксама заснавала езуіцкі калегіум(польск.) бел. у Яраславе.
У 1624 перапахавала ў Астрожскім езуіцкім касцёле рэшткі мужа.
Непрыхільна ставілася да праваслаўнай царквы, перадала грэка-каталікам цэрквы ў Тураве.