wd wp Пошук: ⬜

Віктар Цімафеевіч Лебедзеў

У Вікіпедыі ёсць артыкулы пра іншых асоб з прозвішчам Лебедзеў. Віктар Цімафеевіч Ле́бедзеў (13 студзеня 1932, г. Арол, Расія) — беларускі акцёр. Народны артыст Беларусі (1992).

Біяграфія

Скончыў у 1955 годзе Беларускі тэатральна-мастацкі інстытут. 3 1956 працуе ў Беларускім тэатры юнага гледача.

Памёр 2 снежня 2001 года. Пахаваны на Усходніх могілках Мінска.

Творчасць

Акцёр шырокага творчага дыяпазону. Яго творчасць адметная спалучэннем псіхалагічнага аналізу з выразным знешнім малюнкам. Ролі будуе на эмацыянальных кантрастах, тонка адчувае жанравыя асаблівасці твора.

Сярод роляў: Трахім («Прымакі» Я. Купалы), Кароль, Самахвальскі («Цудоўная дудка», «Несцерка» В. Вольскага), Халімон («Подых навальніцы» І. Мележа), Кароль («Сярэбраная табакерка» З. Бядулі), Анатоль, Андрэй («Папараць-кветка», «Над хвалямі Серабранкі» І. Козела), Круціцкі, Рыспаложанскі («На ўсякага мудраца хапае прастаты», «Банкрут» А. Астроўскага), Румін («Дачнікі» М. Горкага), Хлестакоў («Рэвізор» М. Гогаля), Фёдар («У пошуках радасці» В. Розава), Пратэй, Мальволіо («Два веронцы», «Дванаццатая ноч» У. Шэкспіра), Панталонэ («Зялёная птушка» К. Гоцы), Трэлані, Ліўсі («Востраў скарбаў» Р. Стывенсана), Артур («Авадзень» паводле Э. Войніч), Юліус («Новыя прыгоды Карлсана» паводле А. Ліндгрэн) і інш. Здымаўся ў кіно і на тэлебачанні.

Фільмаграфія

1970—1972 — Руіны страляюць… — нямецкі афіцэр (няма ў тытрах)
1974 — Апошняе лета дзяцінства — тапёр
1979 — Блакітны карбункул — адна з роляў (у тытрах паказаны як М. Лебядзеў)
1983 — Чорны замак Альшанскі — Станкевіч
1987 — Адступнік
1988 — Высакародны разбойнік Уладзімір Дуброўскі
1990 — Чалавек з чорнай «Волгі»
1996 — З пекла ў ад
1998 — Прывітанне ад Чарлі-трубача — прафесар
2000 — Алхімікі — Лавуіт

Агучванне мультфільмаў

1983 — Непаседа

Памяць

На доме па пр. Незалежнасці, 42, у якім Віктар Лебедзеў жыў з 1972 года па 2001 гад, устаноўлена ў мемарыяльная дошка.

Зноскі

Літаратура

Лебедзеў Віктар Цімафеевіч // Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 1999. — Т. 9: Кулібін — Малаіта. — 560 с. — 10 000 экз. — ISBN 985-11-0155-9 (т. 9), ISBN 985-11-0035-8.