Віктар Мікалаевіч Забіла (укр.: Віктор Миколайович Забіла; 1808, в. Забелаўшчына, Барзнянскі раён, Чарнігаўская вобласць — лістапад 1869, Барзна) — украінскі паэт.
Нарадзіўся ў сям’і небагатага памешчыка, нашчадка старадаўняга казацка-старшынскага роду. У 1822—1825 гадах навучаўся ў Нежынскай гімназіі вышэйшых навук.
Затым з 1825 па 1834 год служыў у рускай імператарскай арміі. Выйшаў у адстаўку ў чыне паручніка, потым жыў на сваім хутары недалёка ад Барзна. Сябраваў з Т. Шаўчэнкам, неаднаразова сустракаўся з ім падчас прыездаў паэта на Украіну. Узімку 1847 года Т. Шаўчэнка некаторы час жыў у яго на хутары, напісаў партрэт В. Забілы.
В. Забіла ўдзельнічаў у пахаванні Т. Шаўчэнкі, а затым у добраўпарадкаванні яго магілы. Памёр паэт у лістападзе 1869 года ў горадзе Барзна.