Верхачэ́нскі сельсавет — былая адміністрацыйна-тэрытарыяльная адзінка ў складзе Полацкага раёна Віцебскай вобласці. Цэнтр — вёска Верхачэнне.
Утвораны 20 жніўня 1924 года як Струнскі сельсавет у складзе Полацкага раёна Полацкай акругі БССР. Цэнтр — вёска Струнск. 21 кастрычніка 1924 года цэнтр сельсавета перанесены ў вёску Верхачэнне, сельсавет перайменаваны ў Верхачэнскі. Пасля скасавання акруговай сістэмы 26 ліпеня 1930 года ў Полацкім раёне БССР, з 21 чэрвеня 1935 года — Полацкай акругі, з 20 лютага 1938 года — Віцебскай вобласці, з 20 верасня 1944 года — Полацкай вобласці, з 8 студзеня 1954 года — Віцебскай вобласці. 16 ліпеня 1954 года скасаваны, тэрыторыя ўвайшла ў склад новаўтворанага Палатоўскага сельсавета[1].