У Вікіпедыі ёсць артыкулы пра іншых асоб з прозвішчам Малькова. Вера Міхайлаўна Малькова (18 сакавіка 1903, г. Тэлаві, цяпер Грузія — 19 мая 1964) — беларуская спявачка (лірычнае сапрана). Народны артыст БССР (1949).
Скончыла ў 1933 годзе Тбіліскую кансерваторыю. З 1933 года ў Грузінскім тэатры оперы і балета. З 1937 года салістка Дзяржаўнага тэатра оперы і балета Беларусі. У 1953—1959 гадах мастацкі кіраўнік Белдзяржэстрады.
Валодала высокім вакальным майстэрствам, прыгожым мяккім голасам цёплага тэмбру. Стварыла шэраг паэтычных вобразаў у нацыянальным рэпертуары: Марфачка («Алеся» Я. Цікоцкага), Надзейка («Кветка шчасця» А. Туранкова), Вольга («Кастусь Каліноўскі» Дз. Лукаса), у творах рускай і замежнай класікі — Таццяна («Яўген Анегін» П. Чайкоўскага), Марфа («Царская нявеста[ru]» М. Рымскага-Корсакава), Мажэнка («Прададзеная нявеста[ru]» Б. Сметаны), Мікаэла («Кармэн» Ж. Бізэ), Маргарыта («Фаўст» Ш. Гуно), Чыа-Чыа-сан («Чыа-Чыа-сан[ru]» Дж. Пучыні), Неда («Паяцы[ru]» Р. Леанкавала), сучасных кампазітараў (Наталля ў «Ціхім Доне» I. Дзяржынскага).