wd wp Пошук: ⬜

Беларусбанк

Адкрытае акцыянернае таварыства Ашчадны банк «Беларусбанк» — найбуйнейшы ў Беларусі банк, займае лідзіруючыя пазіцыі ў беларускай банкаўскай сістэме па ўзроўні ўласнага капіталу, актываў, крэдытаў, дэпазітаў[7]. Унесены ў Чорны спіс Еўрасаюза.

Гісторыя

У часы СССР з 1922 па 1987 год у краіне дзейнічала сістэма Дзяржаўных працоўных ашчадных кас СССР. У 1987 годзе быў утвораны Беларускі рэспубліканскі банк Ашчаднага банка СССР, які праз чатыры гады, у 1991 годзе, быў ператвораны ў Ашчадны банк Беларусі. У 1995 годзе ўказам Прэзідэнта Рэспублікі Беларусь Ашчадны банк Беларусі аб’яднаны з акцыянерным камерцыйным банкам «Беларусбанк» у цяперашняе ААТ «ААБ Беларусбанк».

У 1996 годзе ў склад банка ўвайшлі галіновыя банкі «Белсувязьбанк» і «Белжелдорбанк». Укаранёна сістэма «Кліент-банк». У гэты ж час банк становіцца паўнапраўным членам міжнароднай плацежнай сістэмы Europay International. Праз год адкрываюцца прадстаўніцтвы «Беларусбанка» ў Расіі (Масква) і Польшчы (Варшава).

У 2000 годзе банк стаў паўнапраўным членам міжнароднай плацежнай сістэмы VISA International.

У 2003 годзе «Беларусбанк» адкрыў прадстаўніцтва ў Германіі (Франкфурт-на-Майне).

У 2005 годзе быў далучаны камерцыйны банк «МінскКомплексБанк».

У чэрвені 2007 года «Беларусбанк» першым у краіне адкрывае прадстаўніцтва ў Пекіне. Праз год укараняюцца валютна-абменныя аперацыі валютай Народнага банка Кітая.

У верасні 2010 года падпісана першае ў гісторыі банкаўскай сістэмы трохбаковае Рамачнае пагадненне з французскім і бельгійскім банкамі. Наладжана супрацоўніцтва з банкамі больш чым у 30 краінах. Сярод лідараў: Германія, Швейцарыя, Кітай, Польшча і Турцыя. У снежні быў прыцягнуты самы буйны ў гісторыі беларускай банкаўскай сістэмы сіндыкаваны крэдыт у памеры 145 млн дол. ЗША. Тады ж банк перасягнуў 4-х мільённы рубеж па эмісіі пластыкавых картак (на 1 студзеня 2010 года ў абарачэнні знаходзілася 4,9 млн картак).

У маі 2012 года «Беларусбанк» стаў афіцыйным членам Міжнароднага інстытута ашчадных банкаў (WSBI) — адной з найбуйнейшых банкаўскіх асацыяцый, якія прадстаўляюць інтарэсы ашчадных банкаў і ўстаноў рознічных банкаўскіх паслуг ва ўсім свеце. У гэтым жа годзе «Беларусбанк» становіцца банкам-партнёрам Міжбанкаўскага аб’яднання Шанхайскай арганізацыі супрацоўніцтва. Адначасова з гэтым «Беларусбанк» стаў першым банкам у Беларусі, які атрымаў сертыфікат на эквайрынг бескантактавых карт у РБ (Visa payWave).

16 жніўня 2013 года падпісаны дагавор аб стварэнні ЗАТ «БЕЛКАРТ». Заснавальнікамі выступілі ААТ «Банкаўскі працэсінгавы цэнтр», ААТ «ААБ Беларусбанк», ААТ «Белаграпрамбанк» і ААТ «Белінвестбанк».

У 2015 годзе «Беларусбанк» прыцягнуў рэкордны ў айчыннай банкаўскай гісторыі сіндыкаваны крэдыт у памеры 203 мільёна еўра.[8] У 2016 годзе «Беларусбанк» закрыў сваё прадстаўніцтва ў Польшчы[9], а ў 2018 — у Маскве[10].

Уласнікі і кіраўніцтва

Галоўны будынак.
г. Мінск, пр. Дзяржынскага, 18

Кантрольны пакет акцый банка з’яўляецца ўласнасцю Рэспублікі Беларусь. Мажарытарны пакет акцый «Беларусбанка» належыць Дзяржаўнаму камітэту па маёмасці Рэспублікі Беларусь — 98,76 % — прамое валоданне і 1,19 % — ускоснае (адміністрацыйна-тэрытарыяльныя адзінкі). Фізічныя асобы валодаюць 0,0152 % акцый.[11]

Наглядальны савет Каардынуючую функцыю банка выконвае Наглядальны савет, які ўзначальвае Дзмітрый Крутой [12].

Старшыні праўлення

Уладзімір Хілько (1993—1995)
Тамара Віннікава (1995—1996)
Надзея Ермакова (1996—2011)
Сяргей Пісарык (2011—2016)
Віктар Ананіч (з 2017 года)

Дзейнасць

«Беларусбанк» — універсальны банк, які працуе як з фізічнымі, так і з юрыдычнымі асобамі, а таксама аказвае інвестыцыйна-банкаўскія паслугі. Па стане на жнівень 2018 гада ў банку абслугоўваюцца больш за 80 тысяч юрыдычных асоб і індывідуальных прадпрымальнікаў. Сярод буйных кліентаў — ЗАТ «Беларуская нафтавая кампанія», ААТ «Газпром трансгаз Беларусь», ТАА «Еўраторг».[13]

Па маштабу філіяльнай сеткі «Беларусбанк» займае першае месца ў ТОП-10 найбуйнейшых банкаў Беларус[14]. На 2018 год філіяльная сетка банка прадстаўлена:

6 філіяламі-абласнымі (Мінскае) упраўленнямi,
21 філіялам,
103 цэнтрамі банкаўскіх паслуг,
1433 аддзяленнямі,
138 абменнымі пунктамі.[15]

За мяжой банк прадстаўлены прадстаўніцтвамі ў Пекіне і Франкфурце-на-Майне.[16]

У склад банкаўскага холдынгу ўваходзяць:

ТАА «ААБ Лізінг» (99,99 %)
Унітарнае прадпрыемства «ААБ Санаторый Спутнік» (100 %)
Унітарнае прадпрыемства «ААБ Санаторый Сонечны» (100 %)
ТАА «ААБ Кансалт» (60 %)
Унітарнае прадпрыемства «ААБ Брокер» (заснавальнікам прадпрыемства з’яўляецца ТАА «ААБ Лізінг»)[17].

Паказчыкі дзейнасці На 2018 год па памеры актываў «Беларусбанк» займае першае месца ў банкаўскай сістэме Беларусі (27,03 млрд BYN). Прыбытак Банка за 2017 год склаў 172 млн рублёў і вырас у параўнанні з аналагічным перыядам мінулага года на 17 млн рублёў, або на 11 %. Рэнтабельнасць дзейнасці склалася на ўзроўні 6,7 %. Адносіна аперацыйных расходаў да чыстых аперацыйных даходаў ад асноўнай дзейнасці (CIR) склалася за 2017 год на ўзроўні 42,4 % і з’яўляецца найменшай сярод ТОП-10 банкаў Рэспублікі Беларусь.

Рэсурсная база Банка за 2017 год знізілася на 1,5 % і па стане на 01.01.2018 склалася на ўзроўні 28 658 млн рублёў. Крэдытны партфель Банка на справаздачную дату сфарміраваўся ў памеры 17 862 млн рублёў і займае 62,3 % у структуры актываў Банка.[18]

Доля «Беларусбанка» ў агульным аб’ёме актываў беларускага банкаўскага сектара на 1 студзеня 2016 года склала 41,2 %, на рынку прыватных укладаў — 45 %, крэдытны партфель — 72 % усіх выдадзеных крэдытаў насельніцтву.

Аб’ём крэдытных рэсурсаў, прыцягнутых ААТ «ААБ Беларусбанк» ад замежных банкаў і фінансавых кампаній - 1,8 млрд дол ЗША ў эквіваленце. Аб’ём сродкаў карпаратыўных кліентаў — 79 трлн бел руб (3,89 млрд еўра ў эквіваленце). Аб’ём прыцягнутых сродкаў фізічных асоб — 95 трлн бел руб (4,68 млрд еўра ў эквіваленце).

У сусветным маштабе «Беларусбанк» знаходзіцца на 420-ым месцы. Згодна са штогадовым рэйтынгам Топ-1000 банкаў свету[19], апублікаваным міжнародным спецыялізаваным фінансавым выданнем The Banker (выдавецтва Financial Times), па выніках 2015 года ААТ «ААБ Беларусбанк» заняў 10-ае месца сярод 25 найбуйнейшых банкаў Цэнтральнай і Усходняй Еўропы па капіталу 1-ага ўзроўню.

Эканамічны крызіс і санкцыі (з 2020 года)

З 13 сакавіка 2022 года ўвёў абмежаванне на правядзенне безнаяўных расходных аперацый і аперацый зняцця наяўных грашовых сродкаў з выкарыстаннем міжнародных банкаўскіх плацежных картак Visa, Mastercard, Maestro за межамі Рэспублікі Беларусь, аформленых з адкрыццём рахунку толькі ў беларускіх рублях, у эквіваленце 400 беларускіх рублёў на працягу 24 гадзін[20].

Ацэнкі рэйтынгавых агенцтваў, санкцыі ЕС

Міжнароднае рэйтынгавае агенцтва «Fitch Ratings(укр.) бел.» (2018 год):

кароткатэрміновы ў замежнай валюце: B
доўгатэрміновы ў замежнай валюце: B
доўгатэрміновы прагноз: Стабільны
рэйтынг падтрымкі: 4

Standard & Poor’s (красавік, 2018 год):

доўгатэрміновы ў замежнай валюце: В
доўгатэрміновы ў нацыянальнай валюце: B
прагноз: Стабільны[21]

24 чэрвеня 2021 года банк быў унесены ў Чорны спіс Еўрасаюза. Санкцыі Еўрапейскага Саюза прадугледжваюць абмяжаванні на пазыкі на рынках ЕС і даступнасць крэдытаў з тэрмінам пагашэння ў больш чым 90 дзён ад еўрапейскіх контрагентаў. 20 жніўня 2021 года «Fitch Ratings(укр.) бел.» выставіла банку рэйтынг «B» з негатыўным прагнозам. Адначасова з гэтым агенцтва адклікала рэйтынг па прычыне ўнясення банка ў санкцыйны спіс і паведаміла, што больш не будзе ацэньваць альбо рабіць іншы аналіз дзейнасці «Беларусбанку»[22].

Samsung Pay і BELARUSBANK Pay

5 ліпеня «Беларусбанк» сумесна з кампаніяй Samsung Electronics і міжнароднай плацежнай сістэмай Mastercard рэалізаваў для сваіх кліентаў магчымасць аплаты пакупак з дапамогай сэрвісу Samsung Pay. Сэрвіс даступны для трымальнікаў асабістых дэбетавых картак Mastercard «Беларусбанка». Ён прадастаўляецца без спагнання платы, падчас куплі доступ устройства да сеткі Інтэрнэт не патрабуецца, аплата з дапамогай сэрвісу Samsung Pay ажыццяўляецца хутчэй, чым пры выкарыстанні звычайнай карткі.[23]

1 сакавіка «Беларусбанк» рэалізаваў для сваіх кліентаў мабільны плацежны сэрвіс BELARUSBANK Pay, які прадастаўляе магчымасць трымальнікам банкаўскіх плацежных картак Mastercard або Maestro праводзіць бескантактавыя плацяжы мабільным тэлефонам. Праект рэалізаваны ў партнёрстве з плацежнай сістэмай Mastercard. Сэрвіс BELARUSBANK Pay, распрацаваны на аснове тэхналогіі HCE (Host Card Emulation), дазваляе з дапамогай мабільнага тэлефона (з падтрымкай тэхналогіі NFC (Near Field Сommunication) і аперацыйнай сістэмай Android версіі 4.4 і вышэй) і мабільнага дадатка выпусціць без спагнання платы віртуальны аналаг банкаўскай плацежнай карткі для здзяйснення плацяжоў адным дакрананнем тэлефона да бескантактавага плацежнага тэрміналу ў арганізацыях гандлю і сэрвісу.[24]

Іпатэчны офіс

У лютым 2018 года «Беларусбанк» першым у краіне адкрыў Іпатэчны офіс. У ім кліентам прапануецца комплекс паслуг па атрыманні крэдыту на нерухомасць, як на будаўніцтва і набыццё новага жылля, так і на набыццё жылля на другасным рынку. Тут ажыццяўляецца афармленне жыллёвых крэдытаў, і прадастаўляюцца паслугі, неабходныя для правядзення здзелак: падбор варыянту жылога памяшкання, правядзенне здзелкі куплі-продажу або афармлення дагавору з забудоўшчыкам на долевае будаўніцтва, падбор іпатэчнага крэдыту і рэгістрацыю права ўласнасці на нерухомую маёмасць[25].

Дабрачынныя праекты

«Беларусбанк» пазіцыянуе сябе як сацыяльна адказны брэнд. Дабрачынная дзейнасць банка ажыццяўляецца ў рамках пяці праектаў:

«Бацькоўскі дом» — будаўніцтва жылых дамоў для сем’яў, якія выхоўваюць дзяцей-сірот і дзяцей, якія засталіся без апекі бацькоў, аказанне дапамогі пражываючым у іх сем’ям
«Вектар дабрыні» — банк аказвае дапамогу ўстановам аховы здароўя, сацыяльнай абароны, грамадскiм аб’яднанням, маючым патрэбу грамадзянам
«Мост у будучыню» — аказанне дапамогі ўстановам адукацыі, асветы, падтрымка развіцця дзяцей
«Пераможам разам!» — падтрымка спорту высокіх дасягненняў, фізічнай культуры і здаровага ладу жыцця
«Прастора натхнення» — падтрымка арганізацый культуры, мастацтва [26]

Узнагароды

2006, 2010, 2013 гг. — ААТ «ААБ Беларусбанк» атрымаў узнагароду «Банк года» ў Беларусі па ацэнцы эканамічнага часопіса «The Banker».

2008—2015 гг. — «Беларусбанк» прызнаны пераможцам у намінацыі «Банк № 1» у Беларусі Камітэтам Міжнароднага фестывалю-конкурсу «Выбар года».

2009 г. — «Беларусбанк» прызнаны лепшым банкам свету па якасці абслугоўвання кліентаў па сістэме «Western Union».

2009, 2010, 2013, 2015 гг. — «Беларусбанк» названы «Лепшым банкам Рэспублікі Беларусь» па версіі сусветна вядомага фінансавага выдання «Global Finance».

2009—2012, 2015 гг. — фінансавы часопіс «EMEA finance», называючы лепшыя камерцыйныя і інвестыцыйныя банкі ў Цэнтральнай і Усходняй Еўропе і краінах СНД, прызнаў «Беларусбанк» лепшым у намінацыях «Лепшы банк у Рэспубліцы Беларусь», «Лепшы інвестыцыйны банк», «Лепшы брокер».

Па выніках 2010 года «Беларусбанк» быў названы лепшым банкам у рэспубліцы аўтарытэтнымі міжнароднымі эканамічнымі выданнямі «Euromoney», «Business New Europe».

«Беларусбанк» удастоены шэрагу ўзнагарод за высокую якасць выканання міжнародных банкаўскіх пераводаў:

2012 г. — сертыфікат «Standard Chartered Bank» (за высокую якасць афармлення плацежных даручэнняў на міжнародны банкаўскі перавод у фармаце SWIFT); сертыфікат Deutsche Bank AG (Германія) «Deutsche Bank’s Straight-Through Processing (STP) Excellence Award» (па пераводах у доларах ЗША);
2013 г. — узнагарода ат Standard Chartered Bank (Нью-Ёрк, ЗША) «USD Clearing Certificate of Achievement» (па банкаўскіх пераводах у цэлым), і ад Commerzbank AG (Германія) «STP Award’2013» (за высокую якасць афармлення плацяжоў праз рахункі «ностра»);
2014 г. — узнагарода ад Quality Award Raiffeisen Bank International AG (Аўстрыя) «Straight Through Processing (STP)» (па пераводах у еўра), і ад Deutsche Bank Trust Company Americas, New York (па пераводах у доларах ЗША).

У 2011 годзе міжнароднае выданне Trade Finance прызнала праект па фінансаванні кантракта паміж Беларускай чыгункай і кампаніяй Stadler Bussnang AG (Швейцарыя) Праектам 2010 года ў Беларусі.

2012—2013 гг. — «Беларусбанк» атрымліваў узнагароду міжнароднай банкаўскай сістэмы VISA International за якаснае абслугоўванне, у намінацыі «Найменшая колькасць ашуканскіх аперацый».

2014—2015 гг. — «Беларусбанк» атрымаў узнагароды ад Commerzbank AG за супрацоўніцтва з замежнымі фінансавымі інстытутамі ў галіне фінансавання знешняга гандлю; прызнаваўся агенцтвам «Cbonds» лепшым інвестыцыйным банкам Беларусі.

Па выніках 2014 года адзначаны спецыяльным прызам «Самы спагадлівы банк-2014» у рамках намінацыі «Народны рэйтынг» ад аўтарытэтнага фінансава-аналітычнага партала «Infobank.by». 2015 г. — «Беларусбанк» атрымаў узнагароду ад BACEE (Банкаўская Асацыяцыя Цэнтральнай і Усходняй Еўропы) за развіццё міжнароднага банкаўскага супрацоўніцтва.

Зноскі

↑ https://belarusbank.by/ru/33139/33142/history
↑ https://belarusbank.by/ru/33139/33142/visiting_card
1 2 3 4 https://www.nbrb.by/system/Banks/FinancialPosition/BalanceSheet
↑ https://belarusbank.by/ru/33139/33151/33153/11163/32717
↑ https://belarusbank.by/ru/33139/15452/15564
↑ Knowledge Graph — 2012.
↑ https://select.by/content/view/317/311/
↑ http://95.belarusbank.by/#congrats Архівавана 8 жніўня 2018.
↑ https://charter97.org/ru/news/2016/2/29/193217/
↑ https://www.interfax.by/news/belarus/1245427 Архівавана 6 жніўня 2018.
↑ https://belarusbank.by/ru/33139/15452/15564
↑ Наблюдательный Совет
↑ https://belarusbank.by/ru/33139/33142/1745
↑ https://infobank.by/infolineview/top-10-krupnejshix-bankov-po-filialjnoj-seti/
↑ https://belarusbank.by/ru/33139/33142/structure
↑ https://belarusbank.by/ru/33139/33142/structure/1639
↑ https://belarusbank.by/ru/33139/33142/23707/31285 Архівавана 24 студзеня 2021.
↑ https://belarusbank.by/site_ru/33602/GO%202018.pdf
↑ https://www.thebanker.com/Top-1000
↑ Уважаемые клиенты - держатели карточек банка!(руск.) . Сайт ОАО «АСБ Беларусбанк» (12 сакавіка 2022). Праверана 11 сакавіка 2022.
↑ https://belarusbank.app/ru/33139/1653
↑ Fitch Affirms Belarusbank and Belinvestbank at ‘B’/Negative; Withdraws Ratings(англ.) . Fitch Ratings(укр.) бел. (20 жніўня 2021). Праверана 25 жніўня 2021.
↑ https://belarusbank.app/ru/33139/press/bank_news/33899(недаступная+спасылка)
↑ https://belarusbank.app/ru/33139/press/bank_news/33516(недаступная+спасылка)
↑ https://news.tut.by/economics/580886.html?crnd=906 Архівавана 18 студзеня 2021.
↑ https://belarusbank.by/ru/33139/33142/30394