У Вікіпедыі ёсць артыкулы пра іншых асоб з прозвішчам Вернэ.
Арас Вернэ (фр. Emile Jean Horace Vernet; 30 чэрвеня 1789, Парыж — 17 студзеня 1863, Парыж) — французскі мастак і дыпламат. Прадстаўнік вядомай мастацкай дынастыі, сын мастака Карла Вернэ і ўнук мастака Клода Вернэ.
Арас Вернэ нарадзіўся 30 чэрвеня 1789 года ў горадзе Парыжы; сын мастака Карла Вернэ, вучыўся ў бацькі. Зрабіў бліскучую кар’еру мастака і дыпламата, уваходзіў у палітычную эліту краіны як пры Банапарце, так і падчас Рэстаўрацыі. Быў дырэктарам Французскай акадэміі ў Рыме (1829—1835). Пабываў разам з французскім войскам у Алжыры (1833), у 1836 і 1842—1843 прыязджаў з дыпламатычнымі даручэннямі ў Расію, дзе напісаў некалькі карцін па заказах двара.
Вернэ атрымаў шырокую вядомасць як аўтар патэтычных батальных палотнаў (у тым ліку вялізных кампазіцый — Узяцце Танжэра, карціны бітваў: пры Фрыдландзе, Ене, Ваграме і Фантэнуа і інш., — створаных у 1830-я і 1850-я гады па замове Луі Філіпа і Напалеона III і якія захоўваюцца ў Версалі).
Яго паўночнаафрыканскія матывы аказалі вялікі ўплыў на развіццё арыенталізму.