У Вікіпедыі ёсць артыкулы пра іншых асоб з прозвішчам Савасцюк. Антон Іванавіч Савасцю́к[1] (1 мая 1927, в. Баравое, Дзяржынскі раён, БССР — 10 ліпеня 1998) — філосаф. Член-карэспандэнт АН Беларусі (1989), доктар філасофскіх навук (1984), прафесар (1985).
Удзельнік Другой Сусветнай вайны, са студзеня 1943 года сувязны партызанскага атраду «Бальшавік» брыгады імя Сталіна. У 1955 годзе закончыў Беларускі дзяржаўны ўніверсітэт. Са жніўня 1955 года па снежань 1956 года інспектр Койданаўскага раёна выкладчык гісторыі Койданаўскай школы рабочай моладзі. Са снежня 1956 года намеснік загадчыка, з красавіка 1958 года загадчык аддзела прапаганды і агітацыі Дзяржынскага раённага камітэта КПБ. У 1958—1961 гадах аспірант Інстытута філасофіі і права Акадэміі навук БССР. З 1961 года ў Інстытуце філасофіі і права АН БССР (з 1962 года вучоны-сакратар, з 1968 года намеснік дырэктара, у 1989—1992 гадах — загадчык аддзела).
Аўтар больш за 60 навуковых прац, у т. л. 3 манаграфій. Навуковыя працы па сацыяльнай філасофіі і паліталогіі, праблемах сацыяльнага развіцця, структуры грамадства і сацыяльных супярэчнасцях.