Антоніа Пуці́ні або Антоніо Пуці́ні (італ.: Putini, Puttini) — танцоўшчык і балетмайстар 2-й паловы XVIII стагоддзя.
Па паходжанні італьянец. Працаваў у Італіі і Аўстрыі.
Па запрашэнні Г. Ф. Радзівіла з 1756 года працаваў у Слуцку. Навучаў танцам кадэтаў, выступаў у прыдворным тэатры. Разам з Л. Дзюпрэ стварыў Слуцкую балетную школу, у 1758 годзе паказаў школьны спектакль «Балет на тры пары».
У 1756, 1757 і 1759 гадах у складзе Слуцкага балета выступаў як саліст на сцэне Нясвіжскага тэатра.
З 1760 года па распараджэнні М. К. Радзівіла Рыбанькі працаваў у Нясвіжы, у 1771 годзе пакінуў сцэну, стаў прыдворным танцмайстрам.