У Вікіпедыі ёсць артыкулы пра іншых асоб з прозвішчам Кім. Аляксей Харытонавіч Кім (нар. 22 лістапада 1914, в. Сінтухінка, Ханкайскі раён, Прыморскі край, Расія — 9 чэрвеня 1992) — беларускі спецыяліст у галіне тэарэтычнай механікі. Доктар тэхнічных навук (1967), прафесар (1967).
Скончыў Маскоўскі тарфяны інстытут (механічны факультэт, 1937).
Працаваў ва Усесаюзным навукова-даследчым інстытуце тарфяной прамысловасці (інжынер-канструктар), Балахнінскім тарфяным тэхнікуме (1939—1953, выкладчык), Беларускай дзяржаўнай політэхнічнай акадэміі (з 1953, машынабудаўнічы факультэт, кафедра «Тэарэтычная механіка», прафесар, у 1963—1978 — загадчык кафедры, 1968—1976 — дэкан факультэта).
Навуковыя інтарэсы: рэалогія вязкапластычных і іншых няньютанаўскіх сістэм; даследаванне стацыянарнага цячэння вязкапластычнага торфу ў механізмах тарфяных машын; методыка выкладання тэарэтычнай механікі пры падрыхтоўцы інжынераў машынабудаўнічага профілю.
Званне «Заслужаны машынабудаўнік Беларускай ССР» (1980) і інш.