Аляксандр Аганесавіч Таманян (арм.: Ալեքսանդր Թամանյան; 4(16) сакавіка 1878, Краснадар — 20 лютага 1936, Ерэван) — армянскі архітэктар, народны архітэктар Арменіі (1924).
Скончыў Пецярбургскую АМ у 1904 годзе. У ранніх творах (вялікі асабняк Шчарбатава на вуліцы Чайкоўскага ў Маскве, 1911—13; комплекс санаторыя ў Кратава, 1913—23; і інш.) распрацоўваў прынцыпы класіцызму. З 1923 года жыў і працаваў у Ерэване. Стварыў першы генеральны план рэканструкцыі Ерэвана (зацверджаны ў 1924 годзе), праекты планіроўкі Ленінакана (1925), Эчміядзіна (1927—28) і іншых гарадоў. Па яго праектах пабудаваны Дом урада Арменіі, 1926-41, Сталінская прэмія, 1942; тэатр оперы і балета ім. А. А. Спендыярава, 1926—53). Творчасць Таманяна адыграла важную ролю ў фарміраванні архітэктуры Арменіі. У яго гонар названа вуліца ў Ерэване.