У Вікіпедыі ёсць артыкулы пра іншых асоб з прозвішчам Чумакоў.
Алесь Чумакоў (нарадзіўся ў 1981 годзе, Мінск) — майстар-гусляр, адзін з музыкаў гурта «Стары Ольса».
Скончыў Беларускі дзяржаўны ўніверсітэт інфарматыкі і радыёэлектронікі. Паводле адукацыі інжынер па аўтаматычным кіраванні і перакладчык з замежных моваў. Падчас студэнцтва быў актыўным удзельнікам клубаў аўтарскай песні «Плёс», КАП БДУ і клубу аўтарскай песні лінгвістычнага ўніверсітэта.
У 2002 годзе зрабіўся сталым удзельнікам гурта сярэднявечнай музыкі Стары Ольса, дзе і па сёння спявае, грае на гуслях, жалейках і шматлікіх іншых старадаўніх інструментах.
У 2005 годзе стварыў гурт Келіх кола, з якім выконвае на дудзе і гуслях беларускія народныя танцы.
У 2006 годзе пачаў перакладаць ірландскія гераічныя паэтычныя творы на беларускую мову. Ад 2005 года ў створаным ім гурце Ceilidh Ceol спявае на беларускай мове старадаўнія ірландскія песні, у якіх гучыць заклік да свабоды і ўшаноўваецца памяць продкаў.
У лютым 2020 года спеў вакаліста загучаў на канале Netflix у серыяле «Вядзьмар» — у беларускім перакладзе, які цяпер робіцца для інтэрнэт-сервіса, ён спявае песню-мэм «Toss A Coin To Your Withcer» у перакладзе Сяржука Сокалава-Воюша[1].
З пачатку 21 стагоддзя займаецца вырабам гусляў, вывучэннем гісторыі гэтага інструмента, тэорыі і практыкі гусельнага майстэрства. Пэўную колькасць работ (гусляў) зрабіў пад кіраўніцтвам Змітра Сасноўскага.