Скарпіёнавы мухі[1] (Mecoptera) — атрад насякомых з поўным ператварэннем.
Даўжыня да 3 см. Галава прадаўгаватая, падобная да дзюбы. Ротавы апарат грызучага тыпу. Вусікі ніткападобныя. Крылы празрыстыя, сеткаватыя, у некаторых зачаткавыя, ёсць і бяскрылыя віды. Брушка членістае (з 10 сегментаў). Задні канец яго загнуты ўверх, у самцоў уздуты, як у скарпіёнаў (адсюль назва).
У цяперашні час вядома 681 сучасны від (па стане на люты 2008) і каля 400 выкапнёвых відаў. Пашыраны ўсюды. Трапляюцца ў цяністых месцах, на палянах лісцевых лясоў, паблізу штучных насаджэнняў, на снезе, лёдзе. Кормяцца расліннымі і жывёльнымі рэшткамі, пылком і нектарам раслін. Сустракаюцца драпежнікі.
На тэрыторыі Беларусі адзначаны панорпа або скарпіённіца звычайная (Panorpa communis), лядоўнік звычайны (Boreus westwoodi).