Чырвоны карал, высакародны карал (Corallium rubrum) — від кішачнаполасцевах жывёл атрада гарганарыяў, або рагавых каралаў, падкласа васьміпрамянёвых каралавых паліпаў.
Жыве на глыбіні 10—300 м у Міжземным моры, Атлантычным акіяне каля Канарскіх астравоў і інш.
Утварае дрэвападобныя калоніі, да 40 см вышынёй, якія прырастаюць да скалістага грунту. Звонку ўкрыты мяккай карой розных адценняў чырвонага колеру — ад слаба-ружовага да цёмна-чырвонага, амаль чорнага. Восевы шкілет утвараецца ў выніку зліцця вапняковых спікул. На фоне галін калоціі вылучаюцца снежна-белыя паліпы, вяночак: з 8 перыстых шчупальцаў, пры дапамозе якіх жывёла корміцца рачкамі і іх лічынкамі. Пераважна раздзельнаполыя, бываюць гермафрадыты.
Аб’ект промыслу, са шкілета вырабляюць упрыгожанні.