Харці́цкі сельсавет — былая адміністрацыйна-тэрытарыяльная адзінка ў складзе Мастоўскага раёна Гродзенскай вобласці. Цэнтр — аграгарадок (да 2010 г. вёска) Харціца.
Утвораны 12 кастрычніка 1940 года як Русінавецкі сельсавет у складзе Скідзельскага раёна Беластоцкай вобласці БССР. Цэнтр — вёска Русінаўцы. З 20 верасня 1944 года ў складзе Гродзенскай вобласці. 16 ліпеня 1954 года да сельсавета далучана тэрыторыя скасаванага Лаўненскага сельсавета[1]. З 25 снежня 1962 года ў Гродзенскім раёне. З 6 студзеня 1965 года ў Мастоўскім раёне. 23 ліпеня 1965 года перайменаваны ў Харціцкі сельсавет, цэнтр перанесены ў вёску Харціца[2]. 28 жніўня 2013 года скасаваны, тэрыторыя далучана да Дубненскага сельсавета[3].
Насельніцтва сельсавета паводле перапісу 2009 года складала 1108 чалавек[4], з іх 75,1 % — беларусы, 16,0 % — палякі, 6,6 % — рускія[5].
На момант скасавання ў склад сельсавета ўваходзілі 11 населеных пунктаў: аграгарадок Харціца, вёскі Агароднікі, Казакоўцы, Каўшова, Лаўна, Мазанава, Нёман, Раўкі, Русінаўцы, Чарлёна і Чарлёнка.