Хамфры Рэптан (Humphry Repton; 1752—1818) — англійскі ландшафтны архітэктар, прадстаўнік трэцяга (пасля У. Кента і Л. Браўна) і апошняга пакалення майстроў англійскага пейзажнага парку.
Рэптан паходзіў з заможнага сямейства і рыхтаваўся стаць негацыянтам, калі, падчас знаходжання ў сваім памесці, захапіўся садаводствам і акварэльнымі пейзажамі. У 1788 г. пры садзейнічанні герцагаў Портланда і Норфалка ён адкрыў уласную справу. Рэптан не ўхваляў адкрытыя прасторы, імкнучыся засаджваць іх групамі дрэў. Ён не браўся за перапланоўку такіх грандыёзных па плошчы паркаў, як яго папярэднік Браўн, і імкнуўся згладжваць пераход паміж сядзібным домам і паркам за кошт складанай сістэмы лесвіц і тэрас.
Садоўніцкая практыка Рэптана добра вядомая дзякуючы яго ўласным манаграфіям, а таксама факсімільным ілюстрацыям яго рукапісаў, якія было выдадзены ў 4 тамах у 1970-я гады. Перад распрацоўкай праекта «паляпшэнняў» таго ці іншага парку Рэптан выязджаў на мясцовасць, з якой здымаў акварэльныя малюнкі. На іх ён накладваў выяву меркаваных змен і накіроўваў для зацвярджэння землеўладальніку. З архітэктарамі ён часцяком не ладзіў, а з Джонам Нэшам і зусім пасварыўся, абвінаваціўшы яго ў «крадзяжы» ўласнага праекта Каралеўскага павільёна ў Брайтане.
Ёркшырскі пейзаж да перапланоўкі Рэптанам | Той жа пейзаж у выніку перапланоўкі | Расел-сквер у Лондане |