Уілард Фрэнк Лібі (англ.: Willard Frank Libby; 17 снежня 1908, Гранд-Валі, штат Каларада — 8 верасня 1980) — амерыканскі фізіка-хімік. Нобелеўская прэмія па хіміі (1960).
Атрымаў ступені бакалаўра (1931) і доктара хіміі (1933) у Каліфарнійскім універсітэце ў Берклі; там жа выкладаў хімію (1933-1945). У 1945-1959 гадах працаваў у інстытуце ядзерных даследаванняў і Чыкагскім універсітэце. З 1959 прафесар хіміі Каліфарнійскага ўніверсітэта ў Лос-Анджэлесе.
Распрацаваў метад радыевугляроднага датавання, які дазваляе вызначаць узрост археалагічных знаходак (у склад якіх уваходзіць вуглярод) шляхам вымярэння іх радыеактыўнасці, абумоўленай ізатопам 14с. Удзельнічаў у распрацоўцы метаду газадыфузнага выдзялення ізатопа 235U з прыроднага урану.