Усы́са, Гаражанка — рака ў Гарадоцкім, Шумілінскім раёнах Віцебскай вобласці, правы прыток ракі Обаль (басейн Заходняй Дзвіны).
Выцякае з возера Кашо, за 1,5 км на захад ад вёскі Прудок. Цячэ праз азёры Лугавое, Арэхавае, Шчарбакоўскае. У вярхоўі завецца Гаражанка. Упадае ў Обаль ля вёскі Мішневічы ў Шумілінскім раёне.
Даўжыня — 50 км. Плошча вадазбору — 423 км². Вадазбор на паўднёва-заходніх схілах Гарадоцкага ўзвышша і Полацкай нізіне[1]. Азёрнасць вадазбору 1 %.
Шырыня даліны ракі 200—500 м, абалоны 50—80 м. Рэчышча звілістае, берагі пераважна стромкія (вышынёй 1,5—2, месцамі да 6 м)[1].
Асноўны прыток — Каменка. На рацэ горад Гарадок. Уздоўж ракі вёскі Казінова, Старыя і Новыя Вайханы, Крынічная, Мішневічы, Скрыпкі і інш. У басейне Усысы возера Вялікае Астраўлянскае.