Уладзі́мір Ме́ншык (чэшск.: Vladimír Menšík; 9 кастрычніка 1929, Іванчыцы, Чэхаславакія — 29 мая 1988, Брно, Чэхаславакія) — чэшскі акцёр[3] мараўскага паходжання, вядоўца, шоўмен. Народны артыст Чэхаславакіі. Бацька актрысы і вядоўцы Марціны Меншыкавай. У тэатры гуляў вельмі мала — большасць са сваіх 150 роляў выканаў у фільмах і на тэлебачанні.
Скончыўшы вучылішча, пэўны час працаваў на будоўлі. Пасля з другой спробы паступіў у Музычную акадэмію ў Брно, па сканчэнні ў 1953 прыйшоў працаваць у Весніцкі тэатр. Хоць там быў заангажаваны цалкам, усё ж марыў здымацца ў кіно. Упершыню паўдзельнічаў у здымках фільма «Вялікі шанец» у масоўцы. Пасля выканання ролі італьянскага механіка ў фільме «Дзядуля аўтамабіль» рэжысёра Альфрэда Радка нарэшце звярнуў на сябе ўвагу. Аднак гэта не спадабалася Эмілю Францішку Бур’яну, які недалюбліваў кінематограф, таму ў 1958 годзе Уладзімір Меншык сышоў з тэатра і падпісаў дагавор з кінастудыяй «Barrandov».
Яго кінематаграфічнае майстэрства поўнасцю раскрылася ў 50-я—60-я гады. Быў не толькі камедыйным акцёрам; бліскуча выконваў таксама трагікамічныя і нават драматычныя ролі. У 1970-х ужо граў пераважна ў камедыях, як у фільмах, так і ў казках і серыялах. З’явіўся ў сотнях тэлевізыйных перадач, зняўся ў больш чым 150 кіна- і тэлефільмах.
Цягам доўгіх гадоў цяжка хварэў на астму. Акрамя таго, шмат курыў і піў[4][5][6], што вельмі падкасіла ягонае здароўе. Апошні раз здымаўся ў тэлеперадачы «ABECEDA» ў маі 1988[5], праз два дні памёр у Брно. Пахаваны на пражскіх Альшанскіх могілках.
У ягонай роднай хаце ў Іванчыцах ўсталяваная памятная дошка і дзейнічае пастаянная выстава.
29 красавіка 2007 была ўрачыста адкрытая аглядная вежа Уладзіміра Меншыка ў Гліне[7][8][9].
У Брно існуе кавярня Уладзіміра Меншыка, якой валодае ягоны сын Петэр[10].
Уладзімір Меншык быў жанаты двойчы. З першай жонкай Верай мелі двух дзяцей — сына Пятра (1955) і дачку Уладзіміру (1957). З другой жонкай Вольгай мелі яшчэ двух — сына Яна (1962) і дачку Марціну (1965), якая таксама стала актрысай.