Сцяпан Дзмітрыевіч Рыбальчанка (руск.: Степан Дмитриевич Рыбальченко; 28.6 (11.7).1903, с. Новаегарлыкскае, цяпер Сальскі раён, Растоўская вобласць — 18 студзеня 1986) — савецкі военачальнік, генерал-палкоўнік авіяцыі (1944).
Нарадзіўся ў сям’і селяніна. Удзельнік Грамадзянскай вайны 1918-20 — радавы. Скончыў Ваенную акадэмію ім. М. В. Фрунзэ ў 1936 годзе і Вышэйшыя акадэмічныя курсы пры Вышэйшай ваеннай акадэміі ім. К. Варашылава (1951). У Вялікую Айчынную вайну 1941-45 намеснік начальніка штаба кіравання ВПС Паўночнага фронту (1941), начальнік штаба кіравання ВПС Ленінградскага фронту (1941-42), камандуючы ВПС Ленінградскага фронту (люты — лістапад 1942), з лістапада 1942 і да канца вайны камандуючы 13-й паветранай арміяй. Пасля вайны камандаваў ВПС Кіеўскай ваеннага акругі (1946-47), быў генерал-інспектарам і намеснікам галоўнага інспектара па ВПС Галоўнай інспекцыі Узброеных Сіл СССР (1947-50), камандаваў ВПС войскаў Далёкага Усходу і Далёкаўсходняй ваеннай акругі (1951-56). Са снежня 1963 года ў запасе. Узнагароджаны 2 ордэнамі Леніна, 4 ордэнамі Чырвонага Сцяга, ордэнамі Кутузава 1-й і 2-й ступені, ордэнамі Суворава 2-й ступені, Багдана Хмяльніцкага 1-й ступені, а таксама медалямі.