У Швецыі існуе шматпартыйная палітычная сістэма з шматлікімі палітычнымі партыямі. Асаблівасць гэтай сістэмы ў тым, што ў партый не часта ёсць магчымасць атрымаць абсалютную большасць у парламенце і яны вымушаны фармаваць кааліцыйныя ўрады. Згодна з шведскім заканадаўствам палітычнай партыяй з’яўляецца група выбаршчыкаў, якія прымаюць удзел у выбарах пад агульным партыйным найменнем. У той жа час закон не ўсталёўвае жорсткіх патрабаванняў да стварэння палітычных партый. Гэта прывяло да з’яўлення ў Швецыі вялікай колькасці палітычных арганізацый. Усяго ў краіне зарэгістравана 768 палітычных партый. Большасць з іх з’яўляюцца партыямі рэгіянальнага або мясцовага ўзроўню, таксама існуюць т.зв. партыі «аднаго пытання».