«Партрэт доктара Гашэ» (фр.: Portrait du Dr Gachet avec branche de digitale) — карціна галандскага жывапісца Вінцэнта ван Гога, напісаная ў чэрвені 1890, незадоўга да яго смерці. Партрэт Поля Гашэ, які сачыў за здароўем мастака на схіле яго жыцця, з галінкай наперстаўкі (з якой ён зрабіў для мастака гаючы эліксір) быў прададзены на аўкцыёне «Крысціс» 15 мая 1990 года за рэкордную суму ў 82,5 млн долараў. На працягу наступных 15 гадоў карціна ўзначальвала спіс самых дарагіх карцін (якія выстаўляюцца на продаж).
Пасля смерці Ван Гога карціна ў спадчыну перайшла яго сястры, якая, у сваю чаргу, у 1897 годзе прадала яе прыватнаму калекцыянеру. Карціна некалькі разоў пераходзіла з рук у рукі, пакуль яе не набыў ў 1911 годзе Штэделеўскі мастацкі інстытут. Карціна знаходзілася ў Франкфурце-на-Майне да 1937 года. У 1933 годзе пасля прыходу да ўлады нацыянал-сацыялістаў, карціну здымаюць з выставы і пераносяць ў сховішча музея. У 1937 годзе на хвалі кампаніі па ліквідацыі так званага «дэгенератыўнага мастацтва», карціна была канфіскаваная Імперскім міністэрствам народнай асветы і прапаганды. У 1938 годзе Герман Герынг прадаў карціну дылеру твораў мастацтва ў Амстэрдам, а той, у сваю чаргу, перапрадаў яе прыватнаму калекцыянеру Зігфрыду Крамарскі, які збег у час вайны разам з ёй у ЗША. У далейшым карціна часта выстаўлялася ў музеі Метраполітэн.
Другая версія ў цяперашні час знаходзіцца ў Музеі Арсэ ў Парыжы.
«Спадар Гашэ, на маю думку, такі ж хворы і знерваваны, як я ці ты, да таго ж ён нашмат старэйшы за нас і некалькі гадоў таму страціў жонку, але ён урач да мозгу касцей, таму яго прафесія і вера ў яе дапамагаюць яму захоўваць раўнавагу. Мы з ім ужо пасябравалі. Працую цяпер над яго партрэтам: галава ў белай фуражцы, вельмі светлыя і яркія валасы; рукі таксама светлыя, сіняя куртка і кобальтавы фон. Ён сядзіць, абапершыся на чырвоны стол, дзе ляжыць жоўтая кніга і галінка наперстаўкі з ліловымі кветкамі» — Вінцэнт Ван Гог, 1890.