Пазушна — возера ва Ушацкім раёне Віцебскай вобласці, за 22 км на ўсход ад гарадскога пасёлка Ушачы, за 1 км на паўднёвы ўсход ад вёскі Старыя Турасы, у басейне ракі Тураўлянка.
Плошча паверхні 0,12 км². Даўжыня 0,83 км, найбольшая шырыня 0,35 км. Найбольшая глыбіня 20,1 м, сярэдняя — 5,0 м. Даўжыня берагавой лініі 1,94 км. Аб’ём вады ў возеры 0,6 млн м³. Плошча вадазбору 3,83 км².
Схілы катлавіны вышынёй 12—19 м (на захадзе, паўночным захадзе і поўначы 5—9 м), пераважна пад хмызняком, на поўдні пад лесам, на поўначы і ўсходзе ў верхняй частцы разараныя. Берагі на ўсходзе і паўднёвым усходзе зліваюцца са схіламі, пад хмызняком, астатнія сплавінныя. Дно ілістае і сапрапелістае, уздоўж берагоў пясчанае. Зарастае да глыбіні 2 м, усходні заліў зарос поўнасцю. Злучана пратокай з возерам Атолава.