Нéвясель, Нёвясель — возера ў Жыткавіцкім раёне Гомельскай вобласці, за 12 км на поўдзень ад горада Жыткавічы, на паўночнай ускраіне вёскі Боркі. Адносіцца да басейна ракі Прыпяць (фактычна знаходзіцца ў яе пойме).
Плошча 0,04 км², даўжыня 0,58 км, найбольшая шырыня 0,34 км. Даўжыня берагавой лініі 1,58 км. Аб’ём вады 0,032 млн м³. Выцягнута з поўначы на поўдзень. З’яўляецца пойменным возерам. Схілы катлавіны вышынёй да 2 м, пад лугам, месцамі параслі хмызняком. Берагі нізкія, пясчаныя, на захадзе забалочаныя. Пратокай злучана з возерам Бяседка.