Нацыянальны парк Абіску, таксама Абіска (шведск.: Abisko, пн.-саамск.: Ábeskovvu) — нацыянальны парк на поўначы Швецыі, у Скандынаўскіх гарах. Заснаваны ў 1909 годзе як ландшафтны запаведнік. Уключае басейн ракі Абіску і частку паўднёвага ўзбярэжжа возера Турнетрэск. Плошча 7,5 тысяч гектараў. Хваёвыя і мяшаныя лясы. Разнастайная фауна млекакормячых (буры мядзведзь, воўк, лемінг, паўночны алень, пясец, расамаха) і птушак (бакас, беркут, варакушка, курапатка палярная, паморнік даўгахвосты, пуначка, сава белая, уюрок). На тэрыторыі парку навукова-доследная станцыя Шведскай акадэміі навук.