wd wp Пошук: ⬜

Мікалай Сямёнавіч Патолічаў

Мікала́й Сямё́навіч Пато́лічаў (10 (23) верасня 1908, в. Золіна, цяпер Дзяржынскі раён Ніжагародскай вобласці — 1 снежня 1989, Масква [5]) — савецкі партыйны і дзяржаўны дзеяч, у 1950-я гады быў першым сакратаром Камуністычнай партыі Беларусі.

Біяграфія

Мікалай Патолічаў нарадзіўся 23 верасня (па новым стылі) 1908 года ў сям’і будучага ўдзельніка Грамадзянскай вайны Патолічава Сямёна Міхайлавіча. У 1921—1925 г.г. Мікалай працаваў сезонным працоўным, а ў 1926 годзе ўладкаваўся працоўным на завод ім. Свярдлова ў Дзяржынску Ніжагародскай вобласці РСФСР. З 1926 да 1928 года вучыўся ў вучылішчы пры заводзе. З 1928 (калі ён уступіў у партыю) да 1932 гадоў на камсамольскай працы, стаў сакратаром заводскага камітэта камсамолу, а потым сакратаром Дзяржынскага райкама камсамолу. У 1937 годзе Мікалай Патолічаў скончыў Ваенную акадэмію хімічнай абароны ў Маскве і быў накіраваны на пасаду памочніка начальніка хімічнай службы 1 Маскоўскай пралетарскай дывізіі.

З 1938 года Патолічава перавялі на партыйную работу, ён стаў адказным арганізатарам аддзелу ЦК ВКП(б).

З 1939 да 1941 года быў першым сакратаром Яраслаўскага абкама і гаркама партыі, а з 1941 да 1946 года першым сакратаром Чалябінскага абкама і гаркама партыі. У сакавіку — маі 1946 года Патолічаў займаў пасаду загадчыка аддзелу ЦК ВКП(б). У 1946—1947 гадах — сакратар ЦК ВКП(б), член Аргбюро ЦК ВКП(б), начальнік Упраўлення па праверцы партыйных органаў ЦК ВКП(б) і адначасова намеснік кіраўніка Савету па справах калгасаў пры Савеце Міністраў СССР.

З мая да снежня 1947 года Патолічаў заняў пасаду сакратара ЦК КП(б) Украіны. З 1947 да 1950 года быў паніжаны да першага сакратара Растоўскага абкама партыі. З ліпеня 1950 да 1956 года[6] быў першым сакратаром Цэнтральнага камітэта КП(б) Беларусі. Прыняў удзел у аднаўленні эканомікі зруйнаванай пасля Другой Сусветнай вайны Беларусі[7]. Ад 12 чэрвеня 1953 да 25 чэрвеня 1953 года па прапанове Лаўрэнція берыі пасаду першага сакратара ЦК КПБ займаў Міхаіл Зімянін. З 1956 да 1958 займаў пасаду намесніка і першага намесніка міністра замежных спраў СССР. З 1958 да 1985 года быў міністрам знешняга гандлю СССР.

Пахаваны ў Маскве на Новадзявочых могілках.

Узнагароды і ганаровыя званні

Герой Сацыялістычнай Працы (1975, 1978)
Дванаццаць Арданоў Леніна (у т. л., у 1939, 1944, 1945, 1975, 1978)
Ордэн Кастрычніцкай рэвалюцыі (1983)
Ордэн Працоўнага Чырвонага Сцяга СССР (1943)
Ганаровы грамадзянін Чалябінска (1978)

Зноскі

1 2 Nikolai Patolichev // SNAC — 2010. Праверана 9 кастрычніка 2017.
↑ Нямецкая нацыянальная бібліятэка, Берлінская дзяржаўная бібліятэка, Баварская дзяржаўная бібліятэка і інш. Record #118739506 // Агульны нарматыўны кантроль — 2012—2016. Праверана 14 жніўня 2015.
↑ N.S. Patolitschew // filmportal.de — 2005. Праверана 9 кастрычніка 2017.
↑ Нямецкая нацыянальная бібліятэка, Берлінская дзяржаўная бібліятэка, Баварская дзяржаўная бібліятэка і інш. Record #118739506 // Агульны нарматыўны кантроль — 2012—2016. Праверана 31 снежня 2014.
↑ А. Данькоў КПБ Беларусі
↑ Вышэйшыя дзяржаўныя асобы Белай Русі (копія з web.archive.org)
↑ http://berestovitsa.grodno-region.by/ru/region/new_3/ber/jyjal Архівавана 5 сакавіка 2016.

Папярэднік:
Мікалай Гусараў

Першы сакратар ЦК КП(б)Б
7 ліпеня 1950—28 ліпеня 1956

Пераемнік:
Кірыл Мазураў