Міжнародны матэматычны саюз (англ.: International Mathematical Union, IMU) — сусветная некамерцыйная і няўрадавая арганізацыя, створаная для супрацоўніцтва вучоных усіх краін у галіне матэматыкі і садзейнічання развіццю матэматыкі. Заснавана ў 1919 годзе. Уваходзіць у Міжнародную навуковую раду (англ.: International Science Council, ISC, да 2018 года называлася «Міжнародная Рада па навуцы»). Станам на 2019 год членамі Саюза з’яўляліся нацыянальныя матэматычныя арганізацыі 88 краін.
З лютага 2011 года сакратарыят Саюза знаходзіцца ў Інстытуце Веерштраса (Берлін). Прэзідэнтам Саюза ў 2018 годзе на наступны тэрмін (2019—2022) быў абраны Карлас Кеніг, прафесар Чыкагскага ўніверсітэта. Юрыдычна статус Саюза ў Германіі вызначаны як неінкарпараваная дабрачынная арганізацыя.
ММС быў заснаваны ў 1919 годзе, але распаўся ў верасні 1932 года, а затым быў адноўлены ў 1950 годзе на Устаноўчай канвенцыі ў Нью-Ёрку (дэ-факта) або 10 верасня 1951 года, калі дзесяць краін сталі членамі (дэ-юрэ). Апошнім этапам была Генеральная Асамблея ў сакавіку 1952 года ў Рыме, Італія, якая паклала пачатак дзейнасці новага ММС і першага Выканаўчага камітэта; былі абраныя Прэзідэнт і розныя камісіі.