Ма́рцін Бе́нка (21 верасня 1888, в. Кірыпалец, цяпер Косталіштэ, раён Малацкі, Браціслаўскі край, Славакія — 28 чэрвеня 1971, Малацкі, Браціслаўскі край, Славакія) — славацкі жывапісец і графік. Народны мастак ЧССР (1953). Адзін са стваральнікаў славацкай школы жывапісу XX ст.
Вучыўся ў школе А. Кальводы ў Празе. Аўтар манументальных паэтычных сцэн сялянскага жыцця, выкананых у свабоднай постімпрэсіяністычнай манеры, мяккіх і стрыманых па каларыце: «Ля люлькі» (1929), «Лесарубы пад Саланінам» (1931), «Па дарозе на горную пашу» (1933), «Дзве жанчыны», «Бацька з сынам» (абедзве 1934), «Жанчыны-гаранкі з Ліптова» (1936) і інш.