Мале́йкаўскі сельсавет (руск.: Малейковский сельсовет) — адміністрацыйна-тэрытарыяльная адзінка ў складзе Брагінскага раёна Гомельскай вобласці. Адміністрацыйны цэнтр — аграгарадок (да 2011 г. вёска) Малейкі. Знаходзіцца на паўночным усходзе раёна.
Пасля другога ўзбуйнення БССР з 8 снежня 1926 года сельсавет у складзе Брагінскага раёна Рэчыцкай акругі БССР. З 9 чэрвеня 1927 года ў складзе Гомельскай акругі. 30 снежня 1927 года сельсавет узбуйнены, у яго склад увайшла тэрыторыя скасаваных Новамакрэцкага і Сялецкага сельсаветаў. Пасля скасавання акруговага падзелу 26 ліпеня 1930 года ў складзе Брагінскага раёна БССР. З 20 лютага 1938 года ў складзе Палескай вобласці, з 8 студзеня 1954 года — Гомельскай вобласці. 26 сакавіка 1987 года ў склад сельсавета з Крыўчанскага сельсавета перададзены 4 населеныя пункты (вёскі Гарадок, Зарэчча, Сцежарнае і пасёлак Сцежарнае)[2]. 17 лістапада 2005 года скасаваны пасёлак Сцежарнае[3]. 20 жніўня 2008 года была ліквідавана вёска Гарадок[4]. 25 сакавіка 2011 года скасавана вёска Гарадзішча (далучана да вёскі Сялец)[5].
Насельніцтва сельсавета паводле перапісу 2009 года — 1239 чалавек[6], з іх 95,4 % — беларусы, 3,5 % — рускія[7].