У Вікіпедыі ёсць артыкулы пра іншых асоб з прозвішчам Альварэс. Луіс Уолтэр Альварэс (англ.: Luis Walter Alvarez; 13 чэрвеня 1911, Сан-Францыска — 1 верасня 1988, Берклі, Каліфорнія) — амерыканскі фізік-эксперыментатар, член Нацыянальнай акадэміі навук ЗША (1947).
Нарадзіўся ў Сан-Францыска ў сям’і прафесара Каліфарнійскага ўніверсітэта, урача і журналіста ў галіне медыцыны, Уолтэра Клемента Альварэса. Вучыўся ў Чыкагскім універсітэце, які скончыў у 1932 годзе. З 1936 працаваў у Каліфарнійскім універсітэце, з 1945 года на пасадзе прафесара. Адначасова ў 1954—1959 і 1976—1978 займаў пасаду намесніка дырэктара Радыяцыйнай лабараторыі імя Э. О. Лоўрэнса ў Берклі. У 1969 Альварэс быў абраны прэзідэнтам Амерыканскага фізічнага таварыства.