Лунь стэпавы (Circus macrourus) — від мігруючых птушак сямейства каршаковых і падсямейства лунёвых.
Зграбная птушка, даўжыня цела 45-52 см, маса 250—450 г, размах крылаў 0,99-1,17 м. Самцы меншыя за самак і больш светлыя. Спіна шыза-шэрая, брушны бок белы з шызаватым напылам на валляку. Надхвосце белае, канцы крылаў чорныя. Самка зверху вохрыста-бурая, знізу бураватая з цёмнымі падоўжнымі стракацінамі.
Сустракаецца ў паўднёвай частцы Усходняй Еўропы і Цэнтральнай Азіі. Зіму праводзіць, галоўным чынам, у Індыі і Паўднёва-Усходняй Азіі. Вельмі рэдка сустракаецца ў Брытаніі і ў Заходняй Еўропе.
Гэтая драпежная птушка водзіцца на адкрытых раўнінах, балотах і пустках.
Палюе на маленькіх жывёл, такіх, напрыклад, як яшчаркі, грызуны і птушкі. У пошуках ежы птушка лунае нізка над лугамі.
Гняздо птушка будуе на зямлі. У кладцы — 4-6 белых яек.