Курт Тухольскі (ням. Kurt Tucholsky; 9 студзеня 1890, Маабіт, Берлін — 21 снежня 1935, Гётэбарг) — нямецкі журналіст і пісьменнік яўрэйскага паходжання. Ён таксама пісаў пад псеўданімамі Каспар Хаўзер, Петэр Пантэр, Тэабалда Тыгер і Ігнац Вробель.
Лічыцца адным з найбуйнейшых публіцыстаў часоў Ваймарскай рэспублікі. Займаўся палітычнай журналістыкай, пэўны час з’яўляўся адным з выдаўцоў штотыднёвіка «Сусветная трыбуна» (Die Weltbühne). Курт Тухольскі працаваў у галіне грамадскай крытыкі ў традыцыях Генрыха Гейнэ. У той жа час ён быў таленавітым сатырыкам, кабарэтыстам, паэтам-песеннікам і празаікам. Пасля прыходу да ўлады ў Германіі нацыстаў эміграваў у Швецыю. Скончыў жыццё самагубствам.