Красаце́лы (Calosoma) — род жукоў сямейства жужаляў.
Даўжыня 15—35 мм. Цела яркай афарбоўкі, з металічным бляскам. Ніжнія крылы добра развітыя, у горных відаў адсутнічаюць.
Налічваецца каля 40 відаў. Пашыраны ў Еўразіі. Жывуць на глебе і дрэвах. На Беларусі сустракаюцца красацел залатаямкавы (Calosoma auropunctatum), красацел бронзавы або малы (Calosoma inquisitor), красацел пахучы (Calosoma sycophanta) і красацел чорны, або даследчык (Calosoma investigator).
Драпежнікі. Лічынкі і дарослыя жукі знішчаюць вусеняў, кукалак і матылёў, кормяцца таксама іншымі насякомымі, малюскамі, дажджавымі чарвямі. Зімуюць у глебе і подсцілцы. Жывуць 2-4 гады. Пры небяспецы выпырскваюць едкую, пахучую вадкасць.