Гертруда Караліна Монсан (шведск.: Gertrud Carolina Månsson; 18 снежня 1866, Стакгольм, Швецыя — 6 студзеня 1935, там жа) — шведскі дзяржаўны і палітычны дзеяч, член Сацыял-дэмакратычнай рабочай партыі Швецыі. Першая жанчына, абраная ў гарадскі савет Стакгольма, а таксама адна з першых у гісторыі жанчын — палітыкаў Швецыі.
Гертруда Монсан нарадзілася ў сям’і Ёганэса Монсана і Шарлоты Крысціны Ліндквіст. Па прычыне беднасці сям’і ва ўзросце адзінаццаці гадоў Гертрудзе прыйшлося кінуць школу і ўладкавацца пакаёўкай, каб мець магчымасць утрымліваць сябе самастойна. Тым не менш, яна актыўна займалася самаадукацыяй, з ранняга ўзросту цікавілася палітыкай. У 1896 годзе ёй удалося адкрыць уласны магазін у Васастане.