Ганс Кюнг (19 сакавіка 1928, Зурзэе, кантон Люцэрн — 6 красавіка 2021, Цюбінген) — швейцарскі тэолаг, ксёндз. Заснавальнік фонду «Сусветны Этас» (Weltethos).
З 1960 года да выхаду на пенсію ў 1996 годзе ён быў выкладчыкам тэалогіі ў Цюбінгенскім універсітэце.
У снежні 1979 года Кангрэгацыя Веравучэння забаранілаяму навучаць ад імя Каталіцкага Касцёла[7].
Быў адзначаны шматлікімі ўзнагародамі, з’яўляўся ганаровым доктарам 12-і ўніверсітэтаў у розных краінах свету і ганаровым грамадзянінам Цюбінгена.
У 2005 годзе атрымаў прэмію міру Нівано.
Як святар крытыкаваў палітыку Касцёла і перасцерагаў ад празмернай цэнтраліцзацыі ўлады ў Ватыкане. Выступаў за аднаўленне ў касцёле і за экуменічную адкрытасць, мэтай чаго павінна было стаць уз’яднанне падзеленых хрысціянскіх цэркваў.
Напісаў шмат кніг, многія з якіх былі перакладзены ў агульным выніку на 32 мовы. Найбольш вядомыя з іх — «Касцёл» (1967), «Беспамылковы?» (1970), «Быць хрысціянінам» (1974), «Ці існуе Бог?» (1978), «Жыццё вечнае?» (1982) і «Credo» (1992).
Стварыў трылогію, прысвечаную тром монатэістычным рэлігіям: юдаізму, хрысціянству і ісламу (1991—2004). У 1997 годзе апублікаваў працу пад назваю “Сусветны этас для сусветнай палітыкі і эканомікі. Увосень 2002 года выйшла ў свет праца «Здабытая ў змаганні свабода» — першая частка аўтабіяграфіі, а апошняя, трэцяя частка «Перажытая чалавечнасць» з’явілася ўвосень 2013 годзе.