«Віно на свяце Святога Марціна» (нідэрл.: De Wijn van het Sint-Maartensfeest) — самая вялікая[2] з вядомых на гэты момант карціна Пітэра Брэйгеля Старэйшага. Карціна была напісана ў 1565 годзе, у наш час захоўваецца ў зборы музея Прада, дзе ў 2010 годзе пацвердзілі прыналежнасць карціны пэндзлю Брэйгеля.
На карціне намалявана сцэна з сялянскага жыцця — святкаванне дня Святога Марціна, які адзначаецца 11 лістапада, на ім па традыцыі людзі каштуюць першае віно ўраджая гэтага сезона.
«Віно на свяце Святога Марціна» — адна з нешматлікіх ацалелых прац, выкананых на лёне. Да моманту рэстаўрацыі ў пачатку 2000-х гадоў стан карціны вымушаў жадаць лепшага, у тым ліку, гэта звязана з далікатнасцю тэхнікі і крохкасцю матэрыялу, праблемнага для доўгага захоўвання[3].
У 2010 годзе спецыялісты музея Прада пацвердзілі аўтэнтычнасць і аўтарства карціны, даследаванне рэнтгенам дазволіла выявіць фрагменты подпісу Брэйгеля; раней музей набыў карціну за меншую суму, чым яна магла б быць пры наяўнасці пацверджанага аўтарства[4]. Сюжэт карціны адпавядае задакументаванаму апісанню працы, якая захоўвалася ў асабняку роду Ганзага ў пачатку XVII стагоддзя, тым не менш, пацвердзіць гэта напэўна нельга; так, у Музеі гісторыі мастацтваў у Вене знаходзіцца падобная карціна, якая адлюстроўвае святкаванне дня Святога Марціна[2]. Існуе дакументальнае пацверджанне таго, што карціна знаходзілася ў калекцыі IX Герцага Медзінаселі Луіса Франсіска дэ ла Серда і Арагона[2].