Вярхіта — рака ў Дубровенскім і Лёзненскім раёнах Віцебскай вобласці Беларусі, у басейне Заходняй Дзвіны.
Даўжыня ракі 28 км, з іх 19 км у Дубровенскім раёне[1]. Плошча вадазбору 266 (246[2]) км². Сярэдні нахіл воднай паверхні 0,7 м/км.
Пачынаецца за 1 км на поўнач ад вёскі Пятрыкі Дубровенскага раёна, цячэ па Лучоскай нізіне праз азёры Афанасьеўскае і Казённае, пераважна ў лясістай мясцовасці. Упадае ў возера Зелянское з усходу на тэрыторыі Лёзненскага раёна. Рэчышча ад вытоку да вёскі Шэкі на працягу 9 км каналізаванае. У басейне Вярхіты азёры Сітнянскае, Зялёнае, Афанасьеўскае, Казённае.