У Вікіпедыі ёсць артыкулы пра іншых асоб з прозвішчам Багатырова.
Валянці́на Васі́леўна Багатыро́ва (нар. 29 мая 1976, в. Віраўля, Гарадоцкі раён, Віцебская вобласць) — беларускі вучоны-эканаміст, педагог. Доктар эканамічных навук (2014), прафесар (2016). Рэктар Віцебскага дзяржаўнага ўніверсітэта імя П. М. Машэрава (з 2020).
У 1997 годзе скончыла Полацкі дзяржаўны ўніверсітэт па спецыяльнасці «Бухгалтарскі ўлік, аналіз і аўдыт». У 1997—2001 гадах працавала асістэнтам, старшым выкладчыкам кафедры эканомікі і фінансаў Полацкага дзяржаўнага ўніверсітэта. Адначасова навучалася ў аспірантуры Беларускага дзяржаўнага эканамічнага ўніверсітэта па спецыяльнасці «Бухгалтарскі ўлік, статыстыка». У 2001 годзе абараніла кандыдацкую дысертацыю па тэме «Развитие учета формирования финансовых результатов на промышленных предприятиях Республики Беларусь». У тым жа годзе прызначана на пасаду загадчыка новастворанай кафедры фінансаў ПДУ, у 2015 годзе рэарганізаванай ў кафедру фінансаў і галіновай эканомікі. У 2004 годзе прысвоена вучонае званне дацэнта па спецыяльнасці «Эканоміка».
Пасля заканчэння дактарантуры Беларускага дзяржаўнага эканамічнага ўніверсітэта па спецыяльнасці «Фінансы, грашовы зварот і крэдыт» у 2014 годзе абараніла доктарскую дысертацыю па тэме «Финансовое управление воспроизводством человеческого капитала: теория, методология, моделирование». У 2016 годзе прысвоена вучонае званне прафесара па спецыяльнасці «Эканоміка».
З 2017 года — прарэктар Віцебскага дзяржаўнага ўніверсітэта імя П. М. Машэрава, з 2018 года — першы прарэктар гэтага ж універсітэта. 30 студзеня 2020 года прызначана на пасаду рэктара Віцебскага дзяржаўнага ўніверсітэта імя П. М. Машэрава.
Навуковыя інтарэсы сканцэнтраваны ў галіне фінансаў, фінансавага менеджменту і бухгалтарскага ўліку. З’яўляецца аўтарам больш за 100 навуковых і вучэбна-метадычных работ, у тым ліку 8 манаграфій (3 з якіх замежныя), больш за 50 артыкулаў у рэцэнзуемых часопісах Беларусі, Расіі, Украіны, Літвы, Польшчы, Казахстана.