Вайха́нскі сельсаве́т — адміністрацыйна-тэрытарыяльная адзінка ў складзе Гарадоцкага раёна Віцебскай вобласці. Цэнтр — вёска Пруднікі.
Утвораны 20 жніўня 1924 года як Вайханскі (Новавайханскі) сельсавет у складзе Гарадоцкага раёна Віцебскай акругі БССР. Цэнтр — вёска Новыя Вайханы. Пасля скасавання акруговай сістэмы з 26 ліпеня 1930 года ў Гарадоцкім раёне БССР, з 20 лютага 1938 года — Віцебскай вобласці. 10 мая 1958 года ў склад Прудніцкага сельсавета перададзены 4 населеныя пункты (Азёркі, Казінова, Муравіцкія і Цемнікі)[1]. 22 снежня 1960 года да сельсавета далучана тэрыторыя скасаванага Канчанскага сельсавета[2]. 3 ліпеня 1970 года ў склад сельсавета з Прудніцкага сельсавета перададзена вёска Казінова[3]. У 1971 годзе скасаваны вёскі Рамашкіна і Траццякі[4]. 26 сакавіка 1973 года скасавана вёска Карашкі[5]. 8 красавіка 2004 года да сельсавета далучана тэрыторыя скасаванага Прудніцкага сельсавета (13 вёсак: Азёркі, Белахвостава, Вялікае Лосвіда, Вялікія Стайкі, Залучча, Малое Лосвіда, Малыя Стайкі, Марыямпаль, Мялюзіна, Пруднікі, Сілкі, Слабада, Цыганы)[6]. 25 сакавіка 2008 года цэнтр сельсавета перанесены ў вёску Пруднікі.
Насельніцтва сельсавета паводле перапісу 2009 года — 1068 чалавек[7], з іх 89,5 % — беларусы, 8,1 % — рускія[8].