Аму́р чорны (Mylopharyngodon piceu) — від рыб сямейства карпавых.
Даўжыня да 120 см, маса да 30 кг. Цела падоўжанае, спінны і анальны плаўнікі кароткія. Луска буйная. Спіна амаль чорная, бруха крыху святлейшае. Галава невялікая, рот канечны. Глотачныя зубы масіўныя, з добра развітымі жавальнымі паверхнямі, размешчаны ў адзін ці два рады.
Цеплалюбівая рыба. Пашыраны ва Усходняй Азіі ад ракі Амур да Паўднёвага Кітая. Добра расце ў сажалках. На Беларусі работы па гадоўлі пачаты ў 1977 годзе ў Белаазёрскай садковай рыбнай гаспадарцы і рыбгасе «Вілейка».
Корміцца пераважна малюскамі.
Палавой спеласці дасягае на 7—9-м годзе жыцця пры даўжыні каля 70 см. Нераст у чэрвені— ліпені. У прыродных умовах нерастуе пры тэмпературы вады 26—30 °C. Ікра пелагічная, развіваецца ў прыдоннай зоне рэк пакуль скочваецца ўніз па цячэнні. Чорны амур расце хутка, у 1-гадовым узросце даўжыня да 10 см.
Перспектыўны для зарыблення азёр і сажалак і для прафілактыкі паразітарных хвароб, прамежкавыя гаспадары якіх — малюскі.